Kole ke Fetongi Tu‘a Maumau‘i Molumalu Fakafo‘ituitui

Kuo tuku atu ha tohi kole fefakalelei‘aki ‘a e ACC ki he kau mamahi ‘o ha fu’u maumau ne hoko ki he‘enau molumalu fakafo‘ituitui ‘i ha fehālaaki ‘o tuku atu ai hano fakaikiiki ‘o ‘enau ngaahi ‘īmeilí ki ha kakai kehe ka ‘oku nau fakafofonga‘i.

Kuo mahino kuo faka‘ali atu ha totongi huhu‘i ki he kakai ‘e meimei 250 ‘oku tokanga‘i ‘e he ‘iuniti malu taha ‘a e ACC, ‘a e ngaahi fakamatala ki he me‘a kehekehe ‘oku fekau‘aki mo kinautolú – ko e ‘iuniti ‘o e ngaahi taukave pelepelengesi – ‘a ia ‘oku tauhi ai ‘a e ngaahi fakaikiiki ‘o e kakai lavelaveili ‘i he ngaahi fakamamahi mo e ngaahi hia fakalielia.

‘Oku fai e tui ko e pa‘anga ko ia ‘oku faka‘ali atu ‘oku si‘i hifo pē ia ‘i he laungeaú pea ‘oku ‘ikai kau ai ‘a kinautolu ko ia ‘oku ngali ke ‘ikai ke nau fu’u uesiá.

‘Oku fe‘unga mo e kakai ‘e toko 6748 ‘oku ‘i he tānaki’anga fakamatala fakakomipiuta, na’e hoko ai e fo’i tufa fehaalaaki ko eni kia Bronwyn Pullar ‘o ne fai ai e fakatokangá ni. Kuo kole fakamolemole foki ‘a e ACC ‘i he‘enau tōnounou ke fai ha ngāue ki he ngaahi molumalu fakafo‘ituitui ko ‘eni kuo maumau‘i hili hono tuku mai ‘e he The Dominion Post.

Kuo hilifaki e tōnounoú ni ki he tumu‘aki ‘o e sea ‘o e ACC John Judge, mo ha ongo mēmipa poate ko John McCliskie mo Rob Campbell. Kuo toe fakafisi foki mo e pule lahi ‘o e ACC, Ralph Stewart. Na’ e toe fakapapau’i mai meí he Minisitā ‘o e ACC, Judith Collin, ‘i he ‘aho Pulelulu ha toe mavahe mo ha toe toko taha ‘o e poate ko Murray Hilder.

Kuo ‘oatu ai ha kole fakamolemole meí he pule ‘o e ACC ki he ngāue matu‘aki tōnounou kuo nau fai ki he molumalu fakafo’ituitui ‘i he‘enau tuku atu ‘a e ngaahi fakamatala fakaikiiki ‘o e fakamālohi mo e ngaahi mamahi kovi tatau mo iá ki ha taha ‘oku ‘ikai ha’ane kaunga ke ‘ilo ki he ngaahi fakamatala ko iá.

Kuo fakapapau‘i ‘e he Pule Lahi Fakahokongāue, Ralph Stewart, na’e ‘osi ‘oatu ha fakatokanga ki he taha ‘o e kau taki ma’olunga ‘o e ACC ‘i he māhina ‘e tolu kuohilí ki he tufaki atu ‘e he potungāue ‘a e ngaahi fakaikiiki ‘o ha kakai ‘oku ofi ‘i he 9,000 ki ha taha ‘o e ni’ihi ‘oku tokanga‘i ‘e he ACC pea neongo na’e fai e feinga ke kumi e ngaahi failé ni ‘a ia ne totonu ke toe lelei ange ‘enau ngāue ki aí.

Kuo ‘ilo foki ‘e he ACC ‘i he taimí ni ‘a e ‘uhinga ne hoko ai ‘a e fo‘i maumau ko ‘eni ki he ngaahi molumalu fakafo’ituituí pea ‘oku nau lolotonga ngāue atu ki hono toe fakafoki mai ‘o e ngaahi fakamatala ko iá.