Hopo Hake ha Fetu’u he Mala’e ‘o e Mūsika

‘I he’ene fofonga malimali na’e ui ai ia ‘e he ongoongo ‘a e Southland Times ko e – ‘ Le’o ‘o e Fonua’

Na’e hā ‘i he pepa ongongo ko e The Southland Times ‘a Invercargill ‘a hono viki’i ‘o e faka’ali’ali ‘a e finemui ko Seini Fakatava, ‘i hono taleniti hivá.

Na’e ikuna ‘e he finemui ko Seini Fakatava meí he Ako’anga Ma’olunga ‘a e Fanau fefine ‘o Southland (Southland Girls’ High Scool) ‘a e pale ‘uluaki ‘o e fe’auhi taleniti fakafonua ‘i he tafa’aki ‘o e hivá.

Na’e hiva’i foki ‘e he finemui ko ‘ení ‘a  ia ‘okú ne lolotonga ‘i he ta’u hono 6 (year 12) ‘i he kolisi, ‘a e fo’i hiva ‘a e fefine hiva ongoongoa ko ia ko Whitney Houston, ‘oku ‘iloa ko e – ‘Kuo u Tukupā’ pe (‘I Have Nothing’), ‘i he’ene pole’i ‘a e langilangi ko ia ‘o e hoko ko e taha ‘o e ngaahi fo’i fetu’u hopo ‘i he fe’auhi taleniti fakafonua ‘a e fānau ako ‘i Invercargill, Motu Sauté. Na’e pehē ai ‘e Seini ko e hivá na’e tupu pe ia mo ia ka na’á ne toki lau ko ‘ene koloa ‘i hono ta’u hivá.

Na’á ne pehē foki na’e hoko ‘ene tangata’eiki mo e fefine hiva ‘iloa ko ia ko Beyonce Knowles ko hono ‘aitoli ‘i he hivá.

Na’á ne kau atu ki he fe’auhí ni koe’uhi ko ‘ene faka’amu ke vahevahe hono taleniti mo e ni’ihi kehe, pea na’e ‘ikai ha’ane ‘amanaki ki ha ikuna. ‘I he lau ‘a Seini, ‘Na’e kau pē ia ki he fe’auhi ke ma’u ai ‘ene fiefia mo fetaulaki ai mo hano ngaahi kaungame’a fo’ou.

Na’e pehē ‘e he Talekita ‘o  e fe’auhi, Tama Dean, Ko e toki fuofua taimi ‘eni ‘i he ta’u ‘aki ‘eni ‘e hiva ‘o e hisitōlia ‘o e fe’auhí ni ke fakahoko ‘i he saute.

Ko e toko 8 foki meí he toko 14 lelei taha ko e fānau ako Southland kinautolu.

Ko e toko lahi taha ‘o e fānau ako Southland ne kau ki he lelei taha ‘o e ngaahi fe’auhi ‘o e ngaahi ta’u kimu’a ko e toko ua pea ko e toko taha kuo ‘osi a’u ‘o kau ki he toko tolu lelei tahá, ‘i he lau ‘a e talekita.

Ko e ta’ú ni ne ikuna ai ‘e Southland ‘a e fika ‘uluaki mo e ua ‘i tafa’aki ko ē ki he hiva, pea kau ki he toko tolu lelei taha ‘i he ta’u lalahi angé.

Na’e pehē ‘e he talekita ‘oku ‘ikai ha’ane lau ki he ‘uhinga kuo fu’u lelei pehē ai ‘a Southland ‘i he ta’u ní.

“Ko e fānau kotoa pē ne ‘ikai ola lelei ‘i he ta’u ni, te nau ala kau ‘i ha toe ta’u kehe ange. Ko anga ia ‘o e tu’unga lelei ‘oku nau ‘i ai.”

Ko e kau fe’auhí na’e kau ki ai ‘a e fānau ako ta’u ‘uluaki (year 7) ‘i he kolisi ‘o a’u ki he ta’u 8 (year 13), pea na’e hoko e kau fe’auhi mei Core mo Invercargill ke ‘aukau mai ai ha fu’u kau mamata toko lahi fau, ‘a ia ko e toko lahi taha ia kuo lekootí, he ne a’u ki he kau mamata ‘e toko 2500. Ko e toko lahi taha kuo a’u ki ai ‘a e fe’auhí ni ko e toko 2300 ‘i he fe’auhi na’e fai ki Hamilton.

Ko Sam Smith mo Khelley-Ann Atley, meí he Ako’anga Ma’olunga ‘o e Fānau Tangata Southland mo e Ako’anga Ma’olunga ‘o e Fanau Fefine, na’á na ua ‘i he fe’auhi hivá kae tolu ‘a Georgia Camble, ‘o e Epsom Girls’ Grammer, ‘o ‘Aokalani.

Ko e fe’auhi ko ē ‘a e ta’u lalahi ange na’e ma’u ia ‘e ha ongo tā vaiolini ko Michael Roy mo Vanessa Harvey ‘o e Ako Ma’olunga Core mo e Kolisi Sangatao Petelō, kae ua ‘a Sandro Zehnder ‘o e Kolisi Menzies pea tolu leva ‘a Lypsyric’s Redcliffe Peseta, Logan McSoriley, Jordan Knowles, Ollie Carran mo Sam Robertson ‘o e Ako Ma’olunga Fānau Tangata Southland mo e Kolisi Sangato Petelōó.