Ma‘utohi ‘a ‘Eiki Sinaitakala Fakafanua mo Pilinisi Tupouto‘a ‘Ulukālala

Ko ‘Eiki Sinaitakala Fakafanua mo Pilinisi Tupouto’a ‘Ulukālala ‘i he Palasí. TA: www.mic.gov.to

Kuo sila’i fakama’u ‘i he ‘ōlita ‘o e fuakava ta’engatá ‘a e ta’ane ‘a e Pilinisi Kalauni ‘o Tongá, Pilinisi Tupoutoá ‘Ulukālala pea mo ‘Eiki Sinaitakala Tu’imatamoana Fakafanua.

Ko hono hopoki eni e fakafo’ou ‘o e  palasí ‘i ha fuofua ta’ane ‘a e Fale ‘o e Tu’í peá ne fakahoko ‘a e kātoanga māfaná ni ‘e he Tui Fakamaau Lahi ‘o Tongá Michael Dishington Scott pea pehē ki he failēsisitá ko Feleti Tuita.

Na’e ‘afio tonu ai ‘a e Hau-‘o e-‘Otu-Tongá, Tupou VI pea pehē foki ki he ta’ahine kuiní, Nanasipau’u Tuku’aho mo hou’eiki.

Na’e me’a tonu ai mo e fehuhu ‘a Sinaitakalá ‘a Pilinisesi ‘Ofeina-‘E he-Langi Fakafanua.

Ko e ‘aho pe eni ‘o Ha’a Moheofo pea mo hono fakahoko ‘o e maa’imoa-taá mo hono hiki ‘o e ngaahi ‘īmisi ‘o e ongo tamaiki ta’ané.

‘E hoko atu leva he efiafí ni ki he ouau ‘o e fakalēleá ki Siumafua’uta mo e kainga ‘o Fakafanuá.

‘I he ‘aho Tu’apulelulu ko  hono 12 ‘o Siulai ní ‘e fakahoko ai ki he Fale Lotu Senitulí  ki Kolomotu’a  ‘a hono malanga’i ‘o e ta’ané ni.