Toe Fakamo’oni Konrad Hurrell mo e Warriors ki he Faka’osinga 2015

Ko Konrad Hurrel

Ko e vaeua’anga ‘eni ‘o e ta’u ‘e ua ‘o e va’inga ‘akapulu liiki ‘a e talavou Tonga ta’u 20 ko ia ko Konrad Hurrell, ka kuó ne hoko ko e taha’i makatu’u he kuó ne ‘ai ha fo’i tata’o ‘e 12 meí he fo’i tau ‘e 12, ‘o kau ai ‘ene fo’i tata’o tu’o 11 ‘i he’ene fo’i tau ‘e 7 fakamuimuí.

Na’e makehe atu ‘a e hū hake ‘a Hurrell meí he ‘akapulu ‘iunioni he akó ki he ‘akapulu liiki ‘i he faha’i ta’u va’inga kuo ‘osi, ‘o ne tokoni’i ai e kau teuteu Warriors ke tu’o ua hokohoko ‘enau hoko ko e hau ‘o ‘enau fe’auhí.

Ko hono faka’ilo’ilo foki ‘o Konrad ki he ‘akapulu liiki ko e fai ‘e he kapakau tatangi ko ia ko Omar Slaimankhel, ‘i he’ene vikia ‘a e fakalata ‘o e ‘ātakai ‘o e kalapu ‘Aokalani.

Na’e pehē ‘e Konrad, ‘ne faingata’a ke fai ha’ane tu’utu’uni ‘i he ‘uluaki taimi ka ‘oku ne fiefia he’ene fili ke hikí. ‘Oku lahi ange heni ‘eku ma’u pulú ‘i he taimi na’á ku ‘iunioni aí pea ‘oku fefeka ange foki mo tau’aki-tangata.’

‘Kuó u manako ‘aupito he va’inga liiki pea ko hoku loto ke fai hoku lelei taha ‘i he ‘akapulu pea ‘amanaki pē ‘e kei lōloa hoku taimi ke u va’inga ai hení.’

Kuo fakahā foki ‘e he faiako ‘a e Warriors, ‘oku fakavave Kalapu ke fakapapau’i ‘i he vave taha ‘e lōloa ange heni ‘a Konrad koe’uhi he ‘oku ‘osi ‘ene aleapau ki he faka’osinga ‘o e to’u va’inga ‘o e ta’u fo’ou.’

‘Ko e ngāue lelei kuó ne fai ma’ae kalapu talu meí he kamata’anga ‘o e to’u va’inga ‘o e ta’u ní pea ‘oku mau ‘ilo kotoa ‘oku tu’u laine mai ‘a e ngaahi lelíi ke hokohoko mai.’

‘Na’a mau ‘ilo mo fakapapau’i ‘a e mahino hono taleniti pea ‘i he lolotonga ‘o e faha’i ta’u tau fakaangaangá na’a mau sio ai ‘oku ‘i ai ‘a e me’a ‘okú ne makehe atu ai.’

‘Oku pehē ‘e he faifili ‘a e Warriors, Dean Bell, Ko e ola fakafiefia ko ē kuo fakamo’oni sio-tonu ki ai e kalapu, kia Konrad mo Slaimankhel ko e maama faka’ilonga ia ‘o e faingamālie ‘oku ‘atā meí he ‘akapulu liiki ki he kau ‘akapulu ‘iunioní.

‘Kuo faka’ali’ali meí he kalapú ni ki he kau va’inga ‘akapulu ‘iunioni ‘oku ope atu ‘a e me’a te nau a’usia ‘o kapau te nau hū mai ki he Warriors.’